TAMASHA LA NGOMA NA SANAA KUFANYIKA MTWARA NOVEMBER 17-18 MWAKA HUU

Mkurugenzi mwenza wa Shirika la ADEA Bw. Phillipo Lulale kati kati akiongea na waandishi wa habari hawako pichani katika ukumbi wa klabu ya waandishi wa habari Mtwara(MTPC), Kulia kwake ni Bw. Dominic Chonde mratibu wa tamasha na Kushoto ni Saidi Chilumba Afisa utamaduni wa Shirika. Picha Godwin Msalichuma

TAMASHA LA NNE LA MAKUYA KUFANYIKA MTWARA

Na Godwin Msalichuma,

Mtwara,

KWA MUJIBU wa Maelezo ya Mkurugenzi mwenza wa Shirika la (ADEA) Kituo cha Maendeleo Kupitia Uchumi na Sanaa cha mjini Mtwara watafanya tamasha la nne kuanzia Novemba 17 na 18, mwaka huu katika uwanja wa kumbukumbu ya Nangwanda Sijaona mjini hapo.

Bw. Philipo Lulale alibainisha kuwa Shirika lake linajitahidi kuboresha maisha ya wasanii wakiwemo Wachoraji, Wasusi, Mafundi chuma na Wachoraji katika eneo la Kusini mwa Tanzania kupitia mafunzo mbalimbali wanayoyatoa kituoni hapo.

ADEA inajitahidi kufanya yote hayo wakiangalia sera ya utamaduni inasema nini  juu ya tasnia ya sanaa, ukiipitia inabainisha kuwa ukiangalia katika zama hizi za Teknolojia katika utamaduni jamii inaweza kufanya ubunifu wa vifaa au zana, stadi mbinu na taratibu za kufikiri na kutenda ili kudumisha uhai na kuboresha hali ya maisha ya binadamu na mazingira yake.

Shirika lake tokea kuanzishwa kwake mwaka 2004 limeweza kuwakusanya makabila matatu makubwa katika Mkoa wa Mtwara ambayo ni Wamakonde, Wamakuwa na Wayao ambapo wameunda neno moja linalojulika kama (MAKUYA) na kufanya kujulika kama tamasha la MAKUYA.

Aidha ukizingatia sera ya utamaduni inasema kuwa Tanzania hivi sasa inatumia Teknolojia za aina mbili ya jadi na ya kisasa ambapo zote zinatumika sambamba na zinaingiliana na ingefaa zote ziendelezwe na hapo ndipo ADEA wanapoingia kuwatoa mashaka wale wanaosema tamasha la utmaduni lina maana gani na umuhimu gani katika jamii ya sasa.

Hata hivyo Shirika hilo linaamini kuwa utamaduni ni elimu kwa mujibu wa sera yake hiyo ambapo jamii inapata ujuzi na uzoefu kupitia huo na kuurithisha kwa jamii na vizazi vijavyo kwa lengo la kukidhi mahitaji ya kundi hilo.

Awali ya yote kabla hajamaliza kutoa maelezo yake alimkaribisha Bw. Dominic Chonde mratibu wa tamasha ambapo alibainisha kuwa tamasha hilo limegawanyika katika makundi ambapo wapo wacheza ngoma za asili, maonyesho ya wazi ya mafundi wa jadi, banda kwa ajili ya vifaa vya jadi na michezo mbalimbali ya jadi.

Alifafanua kuwa kutakuwa na vikundi kumi na vitano vya ngoma kutoka katika Wilaya za Mkoa wa Mtwara ambapo alitumia fursa hiyo kwakaribisha wananchi wote wa Jamhuri ya Muungano wa Tanzania ndani na nje ya Mkoa huo kuja kutembelea tamasha hilo kwani halina kiingilio na ni mchango wa jamii katika utamaduni wa nchi yetu.

Mwisho