CCM MKOA WA MTWARA WAPATA VIONGOZI WAPYA, WAKATI HUO HUO WAANDISHI WA HABARI WAKUMBUSHWA MAADILI YA HABARI MTWARA

Askari polisi akiwa makini kusimamia ubebaji masanduku ya kura na kwenda kuhesabu

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

                         

 WAKONGWE WABWAGWA UCHAGUZI CCM MTWARA 

Na Godwin Msalichuma,

Mtwara,

UCHAGUZI wa Chama Cha Mapinduzi  (CCM) umefanika mwishoni mwa wiki  katika wilaya zote Sita za Mkoa wa Mtwara huku safu ya wenyeviti ikitawaliwa na sura mpya.

Ni mwenyekiti wa Wilaya ya Masasi pekee, Bw. Kazumali Malilo aliyeweza kutetea kiti chake kwa kishindo kwa kumbwaga mpinzani wake Bw. Andrew Kasawala aliyeambulia kura 224, huku yeye akijizolea kura 1380 kati ya 1604 zilizopingwa.

Nafasi ya ujumbe wa halmashauri kuu (NEC) katika wilaya hiyo imetwaliwa na Bw. Pole Ramadhani kwa kura 978 baada ya kumbwaga mpinzani wake Bi. Ketty Kamba aliyepata kura 489.

Katibu wa CCM wa Mkoa wa Mtwara Alhaji Masoud Mbengule ameiambia Msalichuma Mtwara News ofisini kwake siku ya Jumapili  kuwa uchaguzi huo umepita salama huku nafasi nyingi za uongozi zikichukuliwa na sura mpya.

Alisema katika wilaya ya Newala, Bw. Ali Athumani Sadi ametangazwa kuwa mwenyekiti mpya wa chama hicho baada ya kupata kura 803 dhidi ya mtetezi wa kiti hicho aliyeangukia pua kwa kupata kura 721, huku nafasi ya NEC ikihodhiwa na Bw. George Huruma Mkuchika aliyepata kura 1001 na kuwabwaga  Bw. Abdallah Napinda (267) na Shaibu Namkuna (261).

“Tandahimba nafasi ya uwenyekiti ulirudiwa mara mbili baada ya aliyeongoza kutofikia nusu ya wapiga kura, ziliporudiwa Bi. Sophia Makonyola aliyekuwa anatetea kiti hicho alipata kura 619 na Bw. Abdul Haji Namtula alipata kura 980, hivyo Bw. Namtula ndiye mwenyekiti mpya wa CCM Tandahimba” alisema Alhaji Mbengule.

Aliongeza kuwa “Nafsi ya NEC  jumla ya kura 1623, kura 38 ziliharibika…Balozi Rashid Makame kura 995, Bw. Namyundu Ali Salum kura 419 na Bw. Lihundu Abdallah Samli  alipata kura 171, hivyo M-Nec wa Tandahimba ni  Bw. Balozi Makame”.

Alisema Mtwara mjini nafasi ya uwenyekiti imechukuliwa na Bw. Ali Mussa Chikanwene kwa kura 449 na kumbwaga mtetezi wa kiti hicho Bw. Yusuf Mineng’ene alipata kura 174, huku Bi. Hawa Mangasala akiambulia kura 35 na Bw. Bakari Mbwana kura 6kati ya kura 672 zilizopigwa huku 8 zikiharibika.

Katika nafsi ya Nec, Alhaji Mbengule alisema Bw. Godbless Kweka ameshinda nafasi hiyo kwa kura 373, na kuwabwaga Bw. Saidi Mussa Swalehe aliyepata kura 247, Bw. Phiri Makaburi (29) na Bw. Ernest Haule (16) kati ya kura 668 zilizopigwa huku 3 zikiharibika.

Kwa upande wa Mtwara vijijini, Bw. Ali Komba alimbwaga mtetezi wa kiti cha uwenyekiti  Bw. Ahmadi Likomba baada ya kupata kura 867 kwa 570 kati ya kura 1454 zilizopigwa huku kura 77 zikiharibika.

Aidha kwa upande wa Nec katibu huyo wa Mkoa alisema Bw. Salehe Livanga aliwabwaga  Alhaji Mpeme (390) na Bw. Salehe Nandieti (156) baada ya kupata kura 816 kati ya 1416 zilizopigwa huku kura 54 zikiharibika.

“Wilaya ya Nanyumbu kura nafasi ya uwenyekiti ilirudiwa mara mbili, baada ya marudio matokeo yalikuwa, Bw. Muhata Masusa kura 407 na Bw. Ali Mohamedi Dua kura 395…mwenyekiti mtetezi Bw. Chibwana Mtimbe yeye alishindwa mapema” alisema alhaji Mbengule

Aliongeza kuwa “Nec, Bw. Hassan kambutu alipata kura 426 na kuwashindwa Bw. Rajabu Mrope aliyepata kura 361, Bw. Linga Idd Mpwanya kura 106 na Bw. Mwema Hassan Issa kura 67…M-Nec hapa ni Bw. Kambutu…uchaguzi umepita salama na sura mpya kama nilivyokueleza” alimaliza Bw. Mbengule.

Mwisho

Mwezesheji katika warsha ya siku tatu ya waandishi wa Mtwara juu ya maadili na azimio la Dar es salaam kuhusu uhuru na uwajibikaji wa vyombo vya habari (DEFIR) Deodatus Mfugale akiwa ukumbini

Waandishi wa habari wa Mkoa wa Mtwara wakiwa katika warsha hiyo

WASHAURIWA KUZINGATIA MAADILI

Na Godwin Msalichuma,

Mtwara,

WAANDISHI wa habari Mkoani hapa wamekumbushwa kuzingatia maadili ya kazi yao ili kuweza kuaminika katika kazi zao na jamii ambayo ndiyo mwajiri wao wa kwanza kiuwajibikaji.

Hayo yamebainishwa juzi katika warsha ya maadili ya uandishi wa habari pamoja na azimio la Dar es salaam juu ya uhuru na uwajibikaji wa vyombo vya habari ambayo yanaendelea kwa siku tatu katika ukumbi wa klabu ya waandishi wa habari ya Mtwara, ambayo yameandaliwa na baraza la habari la Taifa (MCT).

Bw. Deodatus Mfugale ni mmoja wa wawezeshaji ambaye alisema kuna umuhimu mkubwa wa kuzingatia maadili ambapo huleta uandishi wa uwajibikaji, kukuza na kujenga taaluma, na ni mwongozo wa utendaji wa kila siku wa shughuli za kiuandishi.

Alisema kuwa ukizingatia misingi ya maadili utafanya kazi za kiuandishi kwa kujitawala mwenyewe bila kusukumwa na mtu mwingine lakini pia huleta ulinzi katika ufanisi wa maslahi yako na jamii kwa ujumla.

“Ukifanya kazi zako kwa kuzingatia maadili na misingi yake kunasaidia sana kwanza kukujenga wewe mwenyewe lakini pia jamii nzima inakuamini na isitoshe chombo unachokifanyia pia kinajenga uaminifu kwako na kwa jamii kinakuwa kioo chao” alisema Bw. Mfugale.

Aidha awali wakati wa kufungua warsha hiyo mwandishi nguli wa siku nyingi Bw.Chrysostom Rweyemamu aliwakumbusha waandishi wa habari wa Mtwara nguzo muhimu katika uandishi wa kuzingatia maadili ambazo alizitaja baadhi yake ikiwa ni ukweli, urari wa habari, usahihi na kutenda haki siku zote za kazi zako.

Aliwakumbusha pia kuwa kuna hatari ya uhuru wa habari kuweza kutoweka iwapo baadhi ya mambo  hayatafuatwa kwa uangalifu mkubwa ambapo miongoni mwayo maslahi duni kwa waandishi wa habari, kuwa na msimamo usioshaurika kwa viongozi na wamiliki wa vyombo vya habari, Rushwa, uelewa na ujuzi Mdogo, kufanya urafiki na Vyanzo vya habari lakini pia kuvunja maadili yenyewe.

Hata hivyo alibainisha kuwa kuna mtanziko na changamoto wakati wa kupata habari ambapo wakati mwingine mwanahabari unatakiwa kuwa makini wakati wa kutimiza majukumu yako na kubadilika kutokana na mazingira unayoyakuta katika eneo la tukio ili uweze kupata habari yako bila mgongano.

Mwisho.