ONGEZENI ADHABU KUPUNGUZA UJANGILI

Na Godwin Msalichuma,

Saanane Mwanza,

ADHABU ndogo zinazotolewa kwa majangili  wanaojihusisha  na uvuvi haramu  wa samaki ni moja ya changamoto inayoikabili hifadhi tarajiwa ya Saanane iliyoko katika Wilaya ya Nyamagana Mkoani Mwanza.

Akizungumza na waandishi wa habari waliotembelea katika hifadhi tarajiwa hiyo ambayo ina visiwa vitatu kaimu mhifadhi  Donatus Bayona alisema kuwa adhabu hizo hazileti fundisho kwani majangili hayo yanayofanya uhalifu mkubwa unaosababisha madhara kwa samaki walio ndani ya ziwa Victoria tofauti na adhabu wanazopatiwa.

Bayona alisema kuwa adhabu ndogo zinazotolewa na mahakama kwa majangili ambao wanapatikana na hatia  kwa kufanya uhalifu ndani ya hifadhi hiyo tarajiwa hazitoi somo kwa jamii na pia haziwezi kumfanya mtu kuacha kuendelea kufanya  uhalifu huo.

“Adhabu za majangili kuwa ndogo bado ni changamoto kwetu wengi wao kesi zao zinaishia kwa kutozwa faini isiyozidi shilingi 10,000 na hata wanaofungwa ni kifungo cha miezi minne au kifungo cha nje, adhabu hizi hazimfanyi mtu aache kazi yake pia hazitoi somo katika jamii inayowazunguka” alisema

Kwa mwaka 2011 alisema jumla ya majangili 12 walikamatwa wakivua samaki kinyume cha sheria ambapo baadhi yao hutumia uvuvi wa sumu ambao unaleta madhara makubwa kwa samaki walio ziwani.

“Hawa wanaovua samaki kwa njia ya sumu wanaleta madhara makubwa kwakua wanaua mazalia ya samaki hali inayochangia kutokuwa na uhifadhi endelevu kama yalivyo malengo ya hifadhi tarajiwa” alisema.

Kaimu mhifadhi huyo alisema kwasasa wanatoa elimu ya uhifadhi kwa jamii kwa ushirikiano na jeshi la polisi na Idara ya uvuvi Mkoani Mwanza ili kuwezesha jamii kushiriki katika swala zima la uhifadhi wa rasilimali hizo.

Hifadhi tarajiwa hiyo yenye Ukubwa wa km 2.1 ilianza mwaka 1964 ikiwa bustani ya wanyama  chini ya Wizara ya Maliasili na baadae mwaka 1991 ikawa pori la akiba  na sasa iko chini ya TANAPA ikiwa katika Mchakato wa kuwa hifadhi Kamili.

Mwisho.