Na
Godwin Msalichuma,
Masasi
SERIKALI
imetakiwa kuwarejeshea fedha walizochangia kwa ajili ya ununuzi wa pembejeo
msimu uliopita wakulima wa korosho wa wilaya ya Masasi, Mkoani Mtwara baada ya kushindwa
kuwasambazia pemebejeo hizo kwa wakati.
Uamuzi
huo umefikiwa mwishoni mwa hivi karibuni katika kikao cha baraza la madiwani wa
halmashauri hiyo, kilichoketi mjini Masasi, baada ya kupokea taarifa ya hali ya
upatikanaji wa pembejeo iliyowasilishwa na ofisa kilimo na mifugo wa Wilaya
hiyo, Bw.Mashaka Mfaume.
Katika
taarifa yake Bw. Mfaume alikieleza kikao hicho kuwa wakulima wa Wilaya hiyo
wanahitaji sulfa ya unga 592.39 tani na dawa za maji lita 48,813 mahitaji
ambayo yalikadiriwa na mfuko wa kusimamia pembejeo nchini (WAKIF).
“Hadi
sasa ni sulfa ya unga tani 84.3 sawa na asilimia 14 ya mahitaji na lita
13,103 za dawa za maji sawa na asilimia 78.19 tu ya pembejeo za korosho ndizo
zilizowafikia wakulima, licha ya msimu wa mahitaji ya dawa hizo kuwadia”
alisema ofisa huyo.
Aliongeza
kuwa “Wakulima wa wilaya ya Masasi katika msimu uliopita kupitia makato ya sh.
30 kwa kilo ya korosho waliyouza walichangia zaidi ya sh. 633,922,830 kwa ajili
ya pembejeo…mikorosho imechipua na uhakika wa kuzipata pembejeo kwa wakati
haupo” alisema Bw. Mfaume.
Alisema
kwa mujibu wa taarifa iliyotolewa na Wakifu kwa halmashauri hiyo, pembejeo za
zao hilo zinatarajia kuingia nchini wiki mbili tangu Juni, 22 mwaka huu.
Taarifa
hiyo iliibua hisia za madiwani hao na kuitaka serikali kurejesha fedha
zilizochangiwa na wakulima haraka sana ili waweze kununua pembejeo maeneo
mengine.
“Serikali
imeshindwa kutimiza wajibu wake, sasa tunaomba fedha ambazo wakulima
wamechangia warejeshewe…na kuanzia sasa makato ya lazima ya fedha hizi yasimame
…wakulima sasa watachangia kwa hiyari yao ” alisema Bw. Albert Mlambala diwani
wa kata ya Mtandi.
Naye
diwani wa kata ya Nanjota Bw. Edward Mmavele aliitaka serikali kuanza malipo
hayo mapema Julai, 2 mwaka huu huku akilaani utendaji kazi wa serikali
uliowafikisha katika hali hiyo.
“Kwanini
mnatunyanyasa wakulima..tunaomba pesa hii irudi..kwa hili habari ya serikali
naomba tusisikilize, na sisi ni mamlaka…naomba mwenyekiti udhihirishe
uwenyekiti wako kwa kuhakikisha fedha hizi zinarudi haraka inavyowezekana”
alisema Bw. Mmavele huku akishangiliwa na madiwani wenzake.
Diwani
wa kata ya Mnavira, Bi. Johari Chilumba alienda mbali kwa kuitaka serikali
kuwalipa fidia wakulima wa korosho kutokana na hasara wanayopata kwa serikali
kuchelewesha pembejeo za zao hilo na kudai kuwa hata zile walizoletewa hazifai
kwa matumizi.
Akihitimisha
hoja hiyo mwenyekiti wa halmashauri hiyo, Bw. Jafari Mkwanda alikubaliana na
hoja za wajumbe hao za kuitaka serikali kurejesha fedha za wakulima na kwamba
nguvu sasa itawekezwa katika kuimarisha mfuko wa pembejeo wa Wilaya hiyo.
“Wote
waliosababisha tatizo hili wawaombe radhi wakulima wa korosho, tena kwa
maandishi ili ifahamike wazi kuwa si halmashauri iliyosababisha hali hii” alisema
Bw. Mkwanda
